အောက်သားလက်အောက်က ရခိုင်နာမည်တိ

အကျွန်ရို့ရခိုင်စာပီနန့် ရခိုင်ယဉ်ကျေးမှုတိကို လေ့လာကြည့်ယင်းနန့် ရခိုင်လူမျိုးတိဧ့ ထူးခြားရေ နာမည် ထားပုံနန့် ရခိုင်အသံထွက်ပုံတိကို သတိထားမိလာပါရေ။ ရခိုင်နန့်အောက်သားရို့ရေ စာပီယဉ်ကျေးမှု နန့် ကိုးကွယ်ရေ ဘာသာတရားတိမာ များကာတူညီမှုဟိကေလေ့ ရခိုင်လူမျိုးရေ အစဉ်အလာကြီးမားရေ လူမျိုးဖြစ်တေ အတွက်နန့် ကိုယ်ပိုင်ဟန်၊ကိုယ်ပိုင်စံနန့်ကိုယ်ပိုင်ယဉ်ကျေးမှုဟိခစွာကား အမှန်ပင်ဖြစ်ပါရေ။ လူတစ်ယောက် ကို ရခိုင်လူမျိုးဟုတ်မဟုတ် ဇာပိုင်သိနိုင်ဖို့လေး ဆိုရေ မီးခွန်းနန့် ကိုယ့်စွာကို အဖြေရှာကြည့်ရေခါ အချက်သုံး ချက်ကို တွိလာရပါရေ။ (၁)ဝတ်စားဆင်ယင်မှု ကိုကြည့်လို့သိနိုင်ရေ။ (၂)အရုပ်အဆင်းကို ကြည့်လို့သိနိုင်ရေ။ (၃)နာမည်ကို ကြည့်လို့သိနိုင်ရေ။ အထက်ပါအချက်တိရေ တဆတ်ဆတ်နန့် ပျောက်စပြုလာပါရေ။ အထူးသဖြင့် အချက်(၁)နန့် အချက်(၂) ရေ ရခိုင်ရို့ဧ့လက်ငင်းဘဝတိနန့် ကင်းကွာလားခစွာကိုတွိရရေ။ အယင်ကရခိုင်လူမျိုးတိရေ တခြားလူမျိုးနန့်မတူ တမူထူးခြားပနာ ဝတ်စားကတ်ကေလေ့ ဧနိ့ရခိုင်လူမျိုးရို့ကား ခေတ်ရီစီးကြောင်းကို လွန်ဆန်နိုင်ရေ အစွမ်း သတ္တိတိ ပျောက်ဆုံးပနာ ကိုယ်ပိုင်ဝတ်စားဆင်ယင်မှုတိ ပျောက်ဆုံးလားခပါဗျာလ်။ အရုပ်အဆင်းဖက်မာလေ့ သွီးရောသွီးနှောမှုတိ ပိုများလာရေအတွက် ရခိုင်သားရို့ ကြံအင်လက္ခဏာတိ မှုန်ဝါးလာစွာကို တွိရပါပနာ ယဉ်ကျေးမှုကြောင့် ရုပ်သဏ္ဍန်ကို ကွဲပြားစီရေ နားထွင်းမင်္ဂလာ အခမ်းအနားတိလေ့ ရခိုင်ယဉ်ကျေးမှုနယ်ပယ် က ပျောက်ကွယ်လာပါလတ်ပါရေ။ နောက်ဆုံးအချက်ဖြစ်တေ ရခိုင်နာမည်တိကလေ့ အခြီယိုင်ပါလတ် စွာကို တွိရပါရေ။ ရခိုင်လူမျိုးရို့ဧ့ နာမည်ထားပုံကြည့်ကေ အောက်သားတိနန့်မတူရေ နာမည်ထားပုံတိကြောင့် ကမ္ဘာမြီထက် မာ စံပြမျိုးစောင့်လူမျိုးဖြစ်တေ ဂျူးလူမျိုးတိကပင် သတိပြုမိစွာကို တွိရပါရေ။ ယေကေလေ့ ကာလကြာရှည်လာ ရေ ကျွန်ဘဝမာ ရခိုင်နာမည်ထားပုံထားနည်းတိ ပြောင်းလာပနာ ရခိုင်နာမည်တိထဲက ရခိုင်အသံထွက်တိလေ့ ရခိုင်ရို့ဧ့ပင်မအသံထွက်တိနန့်မတူဘဲ အောက်သားအသံထွက်နန့်ဂျေး တူလာစွာကိုတွိရပါရေ။ ယင်းနာမည်တိ ကို စီစစ်ကြည့်လိုက်တေခါ အောက်ပါအတိုင်းတွိလာရပါရေ။ (၁) ဦး၊ဒေါ်၊မောင်၊မ နန့် ရခိုင်နာမည် ရခိုင်နန့် ဗမာ လူမျိုးနှစ်ခုစလုံးမာ အသက်ငယ်ရေလူဧ့ နာမည်ရှိမာ ‘မောင်’ နန့် ‘မ’ ထည့်ပနာ ရီးသားခေါ် ဝေါ်ကတ်စွာကို တွိရပါရေ။ ကလေ့ချေဆိုကေ ‘မောင်’ ၊ ကလေ့မေချေဆိုကေ ‘မ’ ထည့်ပနာရီးကတ် ခေါ်ကတ် ပါရေ။ အသက်ကြီးရေလူရို့ဧ့ နာမည်ရှိမာ ယောက်ျားဆိုကေ ‘ဦး’ နန့် မိမ္မဆိုကေ ‘ဒေါ်’ ကို ထည့်ပနာ ရီးသား ခေါ်ဝေါ်ကတ်ပါရေ။ ယေကေလေ့ ဧချင့်က ဒါသီမဟုတ်၊ ယာယီရာဖြစ်တေအတွက် လိုအပ်ခါ သုံးပနာ မလိုအပ် ခါ ဖြုတ်ထားပါရေ။ အင်္ဂလိပ်စာနန့် နှိုင်းပြရဖို့ဆိုကေ ဦးနန့်မောင်ရေ ‘Mr’ ဖြစ်ပြီးကေ ဒေါ်နန့်မရေ ‘Mrs’ ဖြစ် ပါရေ။ အယင်ကရခိုင်လူမျိုးတိမာတော့ခါ ဦးနန့်ဒေါ်နီရာမာ ဘနန့်မိ ကို သုံးရေလို့သိရပါရေ။ အဂုတော့ခါ ဗမာတိနန့်တတူ ဦးနန့်ဒေါ် ကို သုံးနီကတ်ပါဗျာလ်။ နောက်တစ်ခုက ရခိုင်ရို့မာ အယင်ဆုံးမွီးရေ သားသမီးကိုနာမည်ထားရေခါ နာမည်ထဲမာ ‘ဦး’ ကိုထည့်ပနာ ထားပါရေ။ယင်း ‘ဦး’စွာ နာမည်ဧ့ ဇာနီရာမာမဆိုဟိနိုင်ပါရေ။ ဦးသာထွန်း၊လှဦးဖြူ၊ဦးမောင်သိန်း၊ အောင်သာဦး ၊ဦးခိုင်ဇံ ဆိုရေနာမည်တိစွာ သားဦး၊သမီးဦး ရို့ဧ့နာမည်တိဖြစ်ပါရေ။အပြန်အလှန်အနီနန့် နာမည်ထဲမာ ‘ဦး’ ပါရေလူစွာ သားဦး၊မြီးဦး ပင်ဖြစ်ပါရေ။(သားဦး၊မြီးဦးပင်ဖြစ်ကေလေ့ မိဖနှစ်ပါးစလုံး နာမည်မာ ‘ဦး’ ပါကေ သား သမီးနာမည်ကို ‘ဦး’ နန့်ထားလို့မရပါဗျာလ်။ ဇာဖြစ်လို့လေးဆိုကေ မိသားစုတစ်ခုမာ ‘ဦး’ ပါရေ နာမည်သုံးခု မဟိကောင်းပါ။)ဧနာမည်တိထဲက ‘ဦး’ရေ ယာယီမဟုတ် ဒါသီဖြစ်တေအတွက် ယင်း ‘ဦး’ ကို ဖြုတ်ပနာ မခေါ်အပ်မရီးအပ်ပါ။ ယင်း ‘ဦး’ရေ ‘Mr’ကို ဆိုလိုစွာမဟုတ်တေအတွက် ယင်းနာမည်ပိုင်သျှင်စွာ မိမ္မလေ့ ဖြစ်နိုင်ပါရေ။ အသက်ကြီးလာလို့ နာမည်ရှိမာ Mr နန့် Mrs တက်စား ဦးနန့်ဒေါ်ကို ထည့်ချင်ရေလို့ဆိုကေ ယောက်ျားဖြစ်တေ ဦးသာထွန်း ကို ‘ဦးဦးသာထွန်း’၊မိမ္မဖြစ်တေ လှဦးဖြူ ကို ‘ဒေါ်လှဦးဖြူ’ လို့ ခေါ်နိုင်ရီးနိူင်ပါရေ။ နာမည်ထဲမာ ‘မောင်’ နန့် ‘မ’ ပါရေ လူတိလေ့ ယင်းအတိုင်းပင်ဖြစ်ပါရေ။ မောင်သာအောင်၊မသာနူ ဆိုသူရို့ကို သာအောင်၊သာနု ဆိုပြီးကေ မောင်နန့်မကို ဖြုတ်ပနာ မရီးအပ်ပါ။ ဇာဖြစ်လို့လေးဆိုကေ ယင်းနာမည်တိထားရေလောက်ကပင် အမြဲတမ်းခေါ်ဖို့အတွက်ထားကတ်စွာဖြစ်ပါရေ။ နာမည်ရှိမာ ‘မောင်’ပါရေ ကေလေ့သော့ ယင်းတိုင်သျှင်ရေ အချေဖြစ်နိုင်ရေပိုင် ဝါကြီးလေ့ဖြစ်နိုင်ပါရေ။ နာမည်ပိုင်သျှင်ဧ့အရွယ်ကို သိစီချင်ကေတော့ခါ လူငယ်ဆိုကေ ‘မောင်မောင်သာအောင်၊ မမသာနု’ နန့် လူကြီးဆိုကေ ‘ဦးမောင်သာအောင်၊ဒေါ်မသာနု’ ဆိုပနာ ရီးနိုင်ခေါ်နိုင်ပါရေ။ ဧချင့်ရေ အောက်သားတိနန့် မတူရေ ရခိုင်ရို့ဧ့ နာမည်ထားပုံတစ်ခုဖြစ်ပါရေ။ အောက်သားတိမာကျခါ ‘မောင’်နန့် ‘မ’ကို ဖြုတ်ပြီးကေ သာအောင်၊သာနု ဆိုပနာရီးနိုင်ခေါ်နိုင်ရေပိုင် အသက်ငယ်ရွယ်သူတိဖြစ်ပါက မောင်နန့် မ ကို တပ်ပနာ ရီးကတ်ခေါ်ကတ်ပါရေ။ အသက်ကြီးရေအောက်သားတိဧ့ နာမည်ရှိမာ ‘မောင်’နန့် ‘မ’ကို အတွိရနည်းပါရေ။ (၂)အောက်သားတစ်ပိုင်း ရခိုင်နာမည် ဧနာမည်တိရေ အောက်သားနာမည်ကို ရခိုင်မှုပြုထားရေနာမည်တိဖြစ်ပါရေ။ ဧနာမည်တိထဲက အများစုရေ ရခိုင်သရဖြစ်တေ ‘အီ’သရတိကို ဗမာသရဖြစ်တေ ‘ အေ’သရတိနန့် ရီးသားမှည့်ခေါ်ထားရေ နာမည်တိဖြစ်ပါရေ။ ဥပမာ အနီနန့် ပြောရကေ ခိုင်နေဝင်း၊ခိုင်မောင်ထွေးရို့ရေ ရခိုင်ဆိုရေ ဂုဏ်ပုဒ်ကို ဖော်ကျူးပနာ‘ခိုင်’ကို နာမည်ဧ့ရှိမာ ထည့်ဗျာလ်ထားကေလေ့ အောက်သားတစ်ပိုင်းရခိုင်နာမည် တိရာ ဖြစ်ပါရေ။ ဇာဖြစ်လို့လေးဆိုကေ ယင်းနာမည်တိမာပါရေ ‘နေ’ နန့် ‘ထွေး’ ရို့ရေ အောက်သားအသုံးအနှုန်းတိဖြစ်တေအတွက်ကြောင့်ပါ။ ယင်းနာမည်တိကို ရခိုင်အရီးအသား၊ရခိုင်ဘာသာစကားနန့် ရီးရပြောရဖို့ဆိုကေ‘ခိုင်နီဝင်း၊ ခိုင်မောင်ထွီး’ လို့ ရီးရဖတ်ရပါလိမေ။ ယင်းပိုင်မဟုတ်ဘဲနန့် ‘ခိုင်’ပါတိုင်းရာ ရခိုင်နာမည် ဖြစ်တေလို့ဆိုကေ ရခိုင်စာရီးဆရာကြီးတစ်ယောက်သရော်ထားရေပိုင် ‘စွာ’ တစ်လုံးပါစွာနန့် ရခိုင်စကားလို့ သတ်မှတ်ပနာ ရခိုင်စာပီနန့် ဘာသာစကားရေ ငါးပါးမှောက်ကိန်း ဆိုက်လားပါလိမေ။(နာမည်တိထဲမာပါရေ ‘အေး’ ကိုတောင်မှ ရခိုင်ဘာသာစကားအဖြစ်လက်ခံရခက်ပါရေ။ ဇာဖြစ်လို့လေးဆိုကေ ‘အေး’ ရေ ဗမာစကားဖြစ်ပြီးကေ ရခိုင်ရို့နိ့စဉ်သုံးစကားတိထဲမာ ‘အီး’ လို့ရာ ပြောကတ်တေအတွက်ကြောင့် ‘အေး’ပါရေ နာမည်ပိုင်သျှင်တိ စဉ်းစားသင့်ပါရေ။)ယင်းပိုင်ဆိုကေ ရှီးခေတ်ရခိုင်လူမျိုးတိမာ အောက်သားနန့်တူရေ ရခိုင်နာမည်တိ မဟိပါလားလို့ စောဒကတက်လာနိုင်ပါရေ။ ယဉ်ကျေးမှုချင်းဆက်စပ်နီရေအတွက် တူညီမှုတိကားဟိနိုင်ပါရေ။ ယေကေလေ့သော့ ရခိုင်နာမည်များကာရေ အောက်သားတိနန့် ကွဲပြီးကေ နာမည်ကြားလိုက်စွာနန့် ရခိုင်သားမှန်းသိနိုင်ပါရေ။ လက်ဟိအနီအထားအရ ရခိုင်နာမည်တချို့ ရှီးခေတ်ရခိုင်နာမည်တိနန့် မတူဘဲ ဆန်းသစ်လာစွာကို တွိရပါရေ။ ‘မြတ်ခိုင်ကျော်၊ ဝင်းကိုခိုင်၊ ခိုင်ကျော်လင်း၊ ညီမင်းခိုင်’ ဆိုရေ နာမည်တိကို ကြည့်ကေ ရှီးခေတ်ရခိုင်လူမျိုးရို့နာမည်တိနန့် မတူစွာကိုတွိရပါရေ။ ယေကေလေ့သော့ ယင်းနာမည်တိရေ အောက်သားနာမည်လောင်းရိပ်က ကင်းရွတ်ပနာ ရခိုင်နည်း၊ရခိုင်ဟန်နန့် ဆန်းသစ်လာစွာဖြစ်တေအတွက် ရခိုင်မျိုးဆက်သစ်ရို့ လက်ခံကြိုဆိုအတုယူသင့်ပါရေ။ ယင်းတိုင်သျှင်ရို့မာပိုင် စာပီအနုပညာသမားတိနန့် ရခိုင်လူမျိုးကောင်းစားရေးအတွက် တဖက်တလမ်းက လုပ်ဆောင်နီကတ်သူရို့အနီနန့်လေ့ မိမိရို့နာမည်ကို ရခိုင်လူမျိုးရို့အတုယူသင့်ရေရခိုင်နာမည်မျိုး ထားကတ်စီချင်ပါရေ။ ခိုင်ကျော်လင်းနာမည်ကြီးချိန်မာ မွီးလာရေ မျိုးဆက်သစ်ချေတိနာမည်စွာ ခိုင်ကျော်လင်းဖြစ်နိုင်ရေပိုင် ဇင်မာထွန်းနာမည်ကြီးချိန်မာလေ့ မွီးဖွားကြီးပြင်းလာရေ မျိုးဆက်သစ်ချေတိစွာ ဇင်မာထွန်းဖြစ်နိုင်ပါရေ။ ကောင်းစွာကို အတုယူမှုနည်းပါးကေလေ့ ဆိုးစွာကို အတုယူတတ်ကတ်စွာက လူသားရို့သဘာဝဖြစ်တေအတွက်နန့် ရခိုင်လူမျိုးဂုဏ်ပုဒ်ကိုထမ်းပနာ ရှိကလားနီကတ်တေ ရခိုင်လူမျိုးရို့အနီနန့် ရခိုင်ယဉ်ကျေးမှုနန့် ဆန့်ကျင်ရေ နာမည်တိကို ယှောင်ကတ်ဖို့လိုပါရေ။ (၃)အောက်သားအသံထွက်နန့် ရခိုင်နာမည် ဧနာမည်တိစွာ ရခိုင်နာမည်တိကိုဖျက်ဆီးရာရောက်တေပိုင် ရခိုင်စကားအသံထွက်တိကိုလေ့ ပျက်စီးစီပါရေ။အကျွန့်မာ တင်တင်ဦး ဆိုရေ သူငယ်ချင်းမ တစ်ယောက်ဟိပါရေ။ အကျွန်ရို့ရွာမာ စကားနှစ်မျိုး(တောင်မြောက်) ပြောကတ်တေအတွက် တချို့က ယင်းသူ့ကို တင်တင်ဦး လို့ ခေါ်ကတ်တေပိုင် တချို့က တန်တန်ဦး လို့ ခေါ်ကတ်ပါရေ။ဧချင့်ရေ မိရို့ဖလာ အစဉ်အလာသုံး အသံနန့် ခေါ်စွာဖြစ်ပါရေ။ ယင်းပိုင်ခေါ်ကတ်ကေလေ့ ယင်းသူလေးတန်းအောင်လို့ မြို့ကျောင်းကို ရောက်တေခါ ယင်းနာမည်ထဲက အသံထွက်အခေါ်အဝေါ်တိပျောက်ပနာ တိန်တိန်ဦး ဆိုရေ အောက်သားအသံထွက်နန့် နာမည်တစ်ခုကို ပိုင်ဆိုင်လားခပါရေ။ ရခိုင်လူမျိုးရို့မာ အနှစ်နှစ်အလလထိန်းသိမ်းပြောဆိုလာရေ ရခိုင်စကားတိစွာ အောက်သားဘာသာစကားဧ့ လောင်းရိပ်မာ တချက်ချေနန့် ပျောက်ကွယ်လားတတ်တေဆိုစွာ ရခိုင်လူမျိုးရို့သတိချပ်သင့်ပါရေ။ အခြားတစ်ဖက်မာလေ့ စာပီနန့်ဘာသာစကားကို တန်ဖိုးထားရကောင်းမှန်းမသိသူတိက ‘စကားအမျိုးအစားကွဲပြားကေလေ့ ရခိုင်သားရာ’ ဆိုရေ စကားကို အခွင့်ကောင်းယူလားခြင်းပင် ဖြစ်ပါရေ။ ရခိုင်လူမျိုးနာမည်တိထဲမာ ယင်းပိုင်အောက်သားအသံထွက်နန့် နာမည်တိ မကန်မကန်ဟိလာပါရေ။ ‘အင်’ သရအရီးအသားနန့်ရီးထားရေ ‘တင်၊ခင်၊ဇင်’ ရို့ကို ‘တိန်၊ခိန်၊ဇိန်’လို့ အသံထွက်ခြင်း၊ ‘အဉ်’ သရအရီးအသားဖြစ်တေ ‘ယဉ်’ ကို ‘ယိုင’် လို့ မခေါ်ဘဲနန့် ‘ယိန’် လို့ အောက်သားမကျတကျ ခေါ်ခြင်း၊ ရခိုင်ရသံအရီးအသားတိဖြစ်တေ ‘ ရီ၊ မြင့်၊ကြည်’ ရို့ကို အောက်သားတိခေါ်ရေပိုင် ‘ယီ၊မျိန့်၊ကျီ’ လို့ခေါ်ကတ်စွာရေ ရခိုင်သားနန့် ရခိုင်နာမည် လမိုင်းမကပ်ပါလို့ ဆိုချင်ပါရေ။ ရခိုင်ရေ ဗမာမဟုတ်ပိုင် ရခိုင်စကားလေ့သော့ ဗမာစကားမဟုတ်တေအတွက်နန့် ရခိုင်နာမည်ကို ရခိုင်အသံနန့် ခေါ်ဝေါ်ကတ်စီချင်ပါရေ။ ယင်းပိုင်ခေါ်ဝေါ်ခံရဖို့အတွက်လေ့ ယင်းနာမည်ပိုင်သျှင်မာ တာဝန်ဟိပါရေ။ (၄)အင်္ဂလိပ်ပိုင်ရီးရေခါ အောက်သားဖြစ်သားဖြစ်လားရေ ရခိုင်နာမည် ဇာကြောင့်လေးတော့မသိပါ၊ အင်္ဂလိပ်စာတတ်ပါရေ ရခိုင်လူမျိုးတိဂျေး ဧနာမည်တိကို ပိုင်ဆိုင်ကတ်ပါရေ။က၊ခ၊ဂ အစဟိရေ ရခိုင်အက္ခရာတိကို သုံးပနာရီးရေခါ ရခိုင်နာမည်ပီသကတ်ကေလေ့ အင်္ဂလိပ်ပိုင်ရီးရေခါ အောက်သားဘာသာစကားဧ့ လောင်းရိပ်အောက်ကို ရောက်လားခပါရေ။ ဧနာမည်တိစွာ ပွဲပေါက်ပြင်ပေါက်ပြီးကေ လူရှိသူရှိကို အထွက်များရေ ရခိုင်လူမျိုးတိမာ အတွိရများပါရေ။ တော်လှန်ရေး၊ နိုင်ငံရေးနယ်ပယ်ထဲမာ တွိရရေပိုင် ဘလော့ဂ်စာမျက်နှာတိအပါအဝင် အွင်လိုင်းထက်မာ အတွိရများပါရေ။ရခိုင်ပိုင်ရီးရေခါ ‘သန်းဝင်းချေ’ ဖြစ်ပနာ အင်္ဂလိပ်ပိုင်ရီးရေခါ ‘THAN WIN CHAY’ ၊ ရခိုင်ပိုင်ရီးရေခါ ‘မြသာနု’ ဖြစ်ပနာ အင်္ဂလိပ်ပိုင်ရီးရေခါ ‘MYA THA NU’ ရီးကတ်စွာတိရေ ရခိုင်အသံထွက်နန့် တခြားစီဖြစ်နီပါရေ။ ‘ဝင်း၊လင်း၊မင်း’ ကို ‘WIN၊ LIN၊ MIN’ လို့ ရီးကတ်စွာတိနန့် ‘မြင့်၊ ဖြိုး၊ ဖြူ’ ရို့ကို ‘ MYINT၊ PHYO၊ PHYU’ လို့ ရီးကတ်စွာတိလေ့သော့ ရခိုင်စကားအသံထွက်တိနန့် ဆန့်ကျင်နီရေအတွက် ရခိုင်လူမျိုးရို့အနီနန့် ဆင်ခြင်ကတ်ဖို့လိုအပ်ပါရေ။ စာလုံးပေါင်းတိမတည်ငြိမ်ခင်မာ ‘မင်း’ ကို ‘MUN၊ MON၊ MUNN၊MONN၊ MURN၊ MORN၊ MONG’ စသည်ဖြင့် အမျိုးမျိုးရီးသားကတ်ကေလေ့ ဗမာအသံထွက်နန့် ရီးရေ ‘MIN’ နန့်စာကေ ရခိုင်အသံထွက်နန့် အများကြီး ကိုက်ညီမှုဟိစွာကို အင်္ဂလိပ်အသံထွက်ကို နားလည်ရေရခိုင်သားတိုင်းသိပါလိမေ။ရခိုင်နာမည်တိမာအသုံးများရေ ‘ထွန်း’ ကိုလေ့ ဗမာတိသုံးရေ ‘TUN’ ထက် ‘TWAN’ သို့မဟုတ် ‘HTWAN’ နန့် ရီးစွာက ပိုလို့ ရခိုင်အသံနန့် လိုက်ဖက်စွာကို ရခိုင်လူမျိုးရို့အနီနန့် အလိပြုသင့်ပါရေ။ရခိုင်ဘာသာစကားတည်တံ့နီစွာမာ ရကောက်သံတိဧ့ ကျားကန်ပီးမှုကလေ့ အရေးပါရေအတွက်နန့် ရရစ်နန့် ရီးရေရခိုင်နာမည်တိကိုလေ့ ရကောက်သံ (Rသံ) နန့် ရီးသားကတ်ဖို့လိုပါရေ။ ရခိုင်လူမျိုးတစ်ယောက်အနီနန့် ရခိုင်စကားကို ရခိုင်လီသံစစ်စစ်နန့် (အတတ်နိုင်ဆုံး)ပြောသင့်ရေပိုင် ရခိုင်စစ်စစ်နာမည်တစ်လုံးကိုလေ့ ပိုင်ဆိုင်သင့်ပါရေ။ ဧချင့်ရေ ရခိုင်လူမျိုးတိုင်းအတွက် အလွယ်ကူဆုံး အလုပ်ဖြစ်ပါရေ။ ခက်ခဲနက်နဲရေ အလုပ်တိကို မလုပ်နိုင်ကေတောင်မှ လွယ်ကူရေ ဧအလုပ်ချေတိကို ရခိုင်လူမျိုးတိုင်းလုပ်နိုင်ကတ်ပါစီလို့ဆုတောင်းလိုက်ပါရေ။ ခိုင်မင်းဇံ(ရခိုင်ပြည်)

အိသရနန့် ရခိုင်ဘာသာစကားဆက်နွယ်မှုများ

ရခိုင်တေးခြင်းတိ နားထောင်ယင်းနန့် ရခိုင်စာပီကိုစိတ်ဝင်စားစ အရွယ်မာ ရခိုင်စာပီဆိုစွာ ရခိုင်စကားသံတိ ကို ဗမာနန့်သတ်ပုံမတူအောင်ရီးသားရရေ စာပီဖြစ်တေလို့ ထင်မှတ်ခပါရေ။ ယင်းအတွက်နန့် ချစ် ကို ချိုက် ၊ ကြိုက် ကို ကျပြန်ကေ ကြစ် ရီးပနာ ဗမာနန့်မတူရေ အရီးအသားတိနန့်ကျင်ကိုင်နီခလီပါယင့်။ ယင်းအချိန်က အိ သရတချို့ကို အိန့်သရသံနန့် ပြောရေ အကြောင်းကိုလေ့ မသိရေအတွက် ‘ရခိုင်စာပီသင်ရိုး’ လို့ ထင်မှတ်ခရေ ရခိုင်တေးခြင်းစာအုပ်ထဲက အီးသရတစ်လုံးဧ့ အဓိပ္ပါယ်ကို ရှာဖွီယင်း ခခဲမွိနီခပါရေ။ ယင်း ‘အီး’သရက ဇာလေးဆိုကေ ကိုမြတ်ခိုင်ကျော်ဧ့ ‘တမ်းတမိရေဝေ’ တေးခြင်းထဲက ‘တောင်ညိုပြာရိုးမဆီးစွာ ပျံချင်ခါနိမ့် ယက်လခလာ’ တေးခြင်းစာသားမာပါရေ ‘ဆီး’ ဖြစ်ပါရေ။ဧတေးခြင်းစာသားထဲက ‘ဆီး’ ကို အကျွန်ရို့နိ့စဉ်သုံး ရခိုင်စကားတိမာ ‘ဆိန်း’ ဆိုပြီးကေ အိန်းသရ(လုံးတင်နသတ်ရှိကပေါက်)သံနန့် ပြောကတ်တေ။ ကာဆိန်း၊ထရံဆိန်း၊အောင်လူဆိန်း ဆိုပြီးကေပြောကတ်တေပိုင် စာရီးရေခါ ကာဆီး၊ ထရံဆီး၊ အောင်လူဆီး ဆိုပနာရီးရရေလို့ အကျွန်မသိခရေအတွက် ယင်း ‘ဆီး’ ဧ့ အဓိပ္ပါယ်ကို ရှာမရဖြစ်နီခစွာပါ။ ကိုမြတ်ခိုင်ကျော်ကိုယ်တိုင်ကလေ့ ‘ဆီး’ ကို ‘ဆိန်း’ လို့ ရခိုင်အသံနန့်မဆိုဘဲ ဗမာအသံထွက်နန့် ဆိုခရေအတွက်ကြောင့် ရခိုင်ဘာသာစကားနန့် ရခိုင်စာပီစွာ လမိုင်းမကပ်ဖြစ်နီလီခပါယင့်။ အိသရသံတိကို ဖတ်ကတ်တေခါ ပုံမှန်အားဖြင့် ရခိုင်နန့်ဗမာရို့ တူကတ်ကေလေ့ အက္ခရာ ၃၆ လုံး ဟိစွာထဲကအက္ခရာ ၁၀ လုံးလောက်ဧ့ အိသရသံတချို့ကို ရခိုင်ရို့က အိန့် သရ(လုံးတင်နသတ်အောက်မြိတ်)သံနန့် ပြောကြောင်းသိရပါရေ။ ရခိုင်အရီးအသား ရခိုင်အသံထွက် ငြိလားခဗျာလ် ငြိန့်လားခဗျာလ် ညီချေ ညိန်ချေ ဂေါင်းညီး ဂေါင်းညိန်း ထရံဆီးထားရေ ထရံဆိန်းထားရေ အောင်လူဆီး အောင်လူဆိန်း နိရက်(နိ့ရက်) နိန့်ရက် အနီရောင် အနိန်ရောင် ရင်းနှီး ရင်းနှိန်း မှင်းကျိုးသီးအပိ မှင်းကျိုးသီးအပိန့် ပြိနီယင့် ပြိန့်နိန်ယင့် အမိ အမိန့် အမွီ အမွိန် မီးလောင် မိန်းလောင် မစားသိ(မစားသိ့) မစားသိန့် တန်းသီ တန်းသိန် ကြက်သီး ကြက်သိန်း နှသွီး(နှုတ်သွီး) နှသွိန်း(တန်းခိုးဆရာထွန်းဧ့ ပန်းနီလာသာခြင်းမှ) ဟိရေ ဟိန့်ရေ မြည်ဟီး မြည်ဟိန်း ရခိုင်ဘာသာစကားနန့်ရခိုင်စာပီကို လေ့လာမှုအားနည်းရေ ရခိုင်တိစွာ ဖော်ပြပါ အိသရတိထဲကတချို့ကို အသံထွက်ဖက်ကို လိုက်ပနာ အိန့် သရ(လုံးတင်နသတ်အောက်မြိတ်)အရီးအသားနန့် ရီးသားလာကတ်စွာကို တွိလာရပါရေ။ အောင်လူဆီး ကို အောင်လူဆိန်း၊နိ့ရက် ကို နိန့်ရက်၊အောက်မိ ကို အောက်မိန့် ၊ဟိရေ ကို ဟိန့်ရေ ဆိုပနာ အသံထွက် ဖက်ကိုအလီးပီးပနာ ရီးသားကတ်စွာတွိရပါရေ။ ယင်းပိုင်ရီးဖို့တစ်ခါ ပျင်တိုင်း အကျွန်ရို့တိမာ အိသရတိကို အိန့် သရ(လုံးတင်နသတ်အောက်မြိတ်)သံနန့် ဖတ်တေမလား လို့ တစ်ခါ စဉ်းစားကတ်ဖို့လိုပါရေ။ ဗမာအသိုင်းအဝိုင်းနန့် နီးစပ်တေ ရခိုင်တချို့ကျခါ ရခိုင်စကားသံတိကို စံမမွီရေစကားသံအဖြစ်သတ်မှတ်ပနာ အိန့် သရသံနန့် ဖတ်တေ အိ သရသံတချို့ကို ဗမာတိဖတ်တေအတိုင်း ဖတ်လာကတ်စွာ တွိရပါရေ ။အောင်လူဆိန်း လို့ ဖတ်ရဖို့စွာကို အောင်လူဆီး၊ ကြက်သီး လို့ ဖတ်ရဖို့စွာကို ကြက်သီး၊မြည်ဟိန်း လို့ ဖတ်ရဖို့စွာကို မြည်ဟီး ဆိုပြီးကေ ဗမာတိဖတ်တေပိုင် ဖတ်လာကတ်ပါရေ။ဘာသာစကားတိုင်းမာ ခြွင်းချက်တိဟိရေပိုင် ခြွင်းချက်တိ များအားကြီးလို့ ရီးကေအမှန် ဖတ်ကေအသံ မူကို ကိုင်စွဲထားရေ ဗမာရို့မာလေ့ အိ သရ အရီးအသားကို အိန့်သရ(လုံးတင်နသတ်အောက်မြိတ်)သံနန့်ဖတ်တေ ဝေါဟာရတစ်ခုဟိပါရေ။ ရခိုင်ရို့က စက်သီး လို့ခေါ်ရေ ဂါရီသီး(တာယာ)နှစ်လုံး နန့် လူစီးယာဉ် ကို ဗမာရို့က ‘စက်ဘီး’ လို့ ရီးပနာ စက်ဘိန်း လို့ ဖတ်ခြင်းရေအိသရအရီးအသားကို အိန့် သရ(လုံးတင်နသတ်အောက်မြိတ်)နန့် ရီးခြင်းပင်ဖြစ်ပါရေ။ ဗမာစာပီရေ ရခိုင်စာပီကဆင်းသက်လာရေလို့ပြောကတ်တေပိုင် ဗမာစာပီရေ ရခိုင်စာပီဖြစ်တေလို့ ဆိုကတ်ကေလေ့ ရခိုင်စာပီနန့် ဗမာစာပီရေ ဆန့်ကျင်ကွဲလွဲမှုတိဟိကတ်စွာကားအမှန်ပင်ဖြစ်ပါရေ။ ရခိုင်ရို့က အီသရသံနန့် ပြောဆိုစွာတိကို ဗမာရို့က အေသရသံနန့် ပြောကတ်ပနာ ရခိုင်ရို့ဧ့ အေသရသံတိကို ကျခါ ဗမာရို့က အီသရသံနန့် ပြောကတ်ပြန်ရေ။ ဗမာရို့ဧ့ သေကြေ၊၊ ကမ်းခြေ၊ ငွေမောင်း၊စေခိုင်း၊ တွေ့ဆုံ၊အထွေး၊ နွေရာသီ၊ စာပေ၊ ရှာဖွေ၊အမွေ၊သောက်ရေအိုး၊လေပွေ၊ ရေကန်၊ မြေပြင်၊ အစဟိရေ အေ၊ အေ့၊ အေးသရတိကို ရခိုင်ရို့က သီကြီ၊ ကမ်းခြီ၊ ငွီမောင်း၊ စီခိုင်း၊တွိဆုံ၊အထွီး၊ နွီရာသီ ၊ စာပီ၊ ရှာဖွီ၊ အမွီ၊သောက်ရီအိုး၊လီပွီ၊ရီကန်၊ မြီပြင်ဆိုပြီးကေ အိ၊အီ၊အီး သရသံတိနန့် ပြောကတ်ပါရေ။ ခြွင်းချက်အနီနန့် ကြီးမား၊စီးပွား၊လုပ်ကျွေး ၊ဖေးမအစဟိရေ ဘုံသုံးသရ စကေတပွေတော့ခါ ဟိပါရေ။ ရာစုနှစ်နန့် ချီပနာရှည်ကြာလာရေ ကျွန်ဘဝမာ ဗမာစာပီကို ကိုယ့်စာပီနီရာမာ အစားထိုး သင်နီကတ် ရစွာကတစ်ကြောင်း၊ကိုယ့်စာပီဖြစ်တေ ရခိုင်စာပီကို ဖော်ထုတ်သင်ကြားခွင့်မရစွာကတစ်ကြောင်း အိ၊အီ၊အီး သရသံတချို့ရေ ရခိုင်ရို့ဧ့ ပဇဖျားမာ အေ၊အေ့၊အေးသရသံအဖြစ် အခြီယိုင်ပါလတ်စွာတွိရပါရေ။ ငွေကြေး၊ သူဌေး၊မြေပြင် အစဟိရေ အေ၊ အေ့၊အေး သရသံတိစွာ မူလ အိ ၊အီ၊ အီး သရသံတိက အခြီယိုင်ပါ လတ် တေပိုင် ဖြီ၊ကြီ ရို့ပိုင် နှစ်ဖက်ခွထိုင်ပနာ အခြီယိုင်နီရေ အီသရ တချို့လေ့ဟိလာပါရေ။ အဖြေနန့် ကြိုးဖြီ ၊အစာကြေနန့် ကြီမွ ရို့ကို အေသရနန့် အီသရ ခွဲခြားပနာ သုံးနီကတ်ကေလေ့ အဓိပ္ပါယ် တတူပင်ဖြစ် ပါရေ။ရခိုင်စာနန့် ဘာသာစကားတိ ကမောက်ကမ ဖြစ်နီရစွာရေ ဗမာစာနန့် ဘာသာစကား တိကြောင့်ဖြစ် တေအတွက် ဗမာစာပီနန့်မတူရေ ရခိုင်အရီးအသားတိနန့် ရခိုင်စကားအသံထွက်တိကို ဖော်ထုတ် ထိန်းသိမ်းကတ်ဖို့လိုပါရေ။ အထက်မာတင်ပြခယှောင်မျိုး ရခိုင်ကသံမာဖြစ်တေအီသရကိုသုံးပနာ ဗမာတိက အေသရကို သုံးကတ်တေပိုင် ဗမာတိနန့် အရီးအသားတူပြီးကေ ရခိုင်ကအေသရသံနန့်ပြောပနာ ဗမာက အီသရသံ ပြောစွာတိလေ့ဟိပါသိ့ရေ။ယင်းချင့်ကား ဗမာတိနန့်အရီးအသားမာတူပြီးကေ အသံထွက်ကွဲရေ ‘အည်’(ညသတ်) ပင်ဖြစ်ပါရေ။ ညသတ် အများစုကို ဗမာရို့က အီသရသံ(သံမာ) နန့် ပြောကတ်ကေလေ့ ရခိုင်ရို့မာကား ယင်းတိုင်သားတိနန့် ဆန့်ကျင်ဖက်ဖြစ်တေ အေသရသံ(သံပျော့)တိနန့် ပြောကတ်ရပါရေ။ စံအရီးအသား ရခိုင်အသံထွက် ဗမာအသံထွက် ကြည်နူး ကြေနုန်း ကျီနူး ရောင်ခြည် ရောင်ခြေ ယောင်ဂျီ စည်းကမ်း စေးကမ်း စီးကမ်း ဆည်မြောင်း ဆေမြောင်း ဆီမျောင်း တည်တံ့ တေဒံ့ တီတန့် အနည် အနေ အနီ တပည့်တော် တဗေ့ဒေါ် တဗျိဒေါ် နာမည် နာမေ နာမျီ ရည်စူး ရေဇူး ယီဇူး ။ ‘မည်’နန့် ‘သည်’ ကို ဝါကျအဆုံးမာ သုံးရေခါတော့ခါ ဗမာတိပြောရေပိုင် ‘မီ’၊ ‘သီ’ လို့ ပြောကတ်ပါရေ။ဧချင့်ကလေ့ ဗမာစာပီသင်ဖန်များလာရေအတွက် ဗမာတိပါးက ကူးစက်လာစွာ ဖြစ်ဖို့များပါရေ။ (ဗမာတိမာ အည် သရ တချို့ကို အေ အရသံနန့် ဖတ်စွာတိလေ့ဟိပါရေ။) ညသတ်တချို့ကို ရှီးခေတ်ရခိုင်ရို့က ‘အိုင်’(လုံးတင်ချောင်းငင်ငသတ်)သံနန့် ပြောခကတ်ပါရေ။ ဆရာကြီးမောင်စံဖော်က ရှီးခေတ်ရခိုင်အရီး‘လည်ပင်း’ ကို ရခိုင်ကို ရခိုင်ရို့က ‘လိုင်ဖင်း’ ဖတ်ကြောင်း ရိုးမခေါ်သံစာအုပ်က ဆောင်းပုဒ်မာရီးထားရေပိုင် ရခိုင်သင်ပုန်းကြီးမာလေ့ ‘ကည်’ရေ ‘ကိုင်’ အသံထွက်ကြောင်းဖော်ပြထားပါရေ။ယင်းအပြင် ညကြီး(ည)ထဲမာ ပါရေ ညချေ(ဥ)ကြောင့် ညကြီး(ည)ရှိက ‘အ’သရကို ‘အိုင်’ (လုံးတင်ချောင်းငင်ငသတ်) သံနန့် ဖတ်ရစွာတိလေ့ ရခိုင်စာပီမာ ဟိပါသိ့ရေ။ အညမည ကို အိုင်ညမိုင်ည၊ ဓညဝတီကို ဓိုင်ညဝတီ ၊ ပညာ ကို ပိုင်ညာ လို့ ဖတ်ကတ်စွာတိရေ ရခိုင်စာပီနန့် ဘာသာစကားတိဧ့ ထူးခြားမှုပင်ဖြစ်တေ။ အကျွန်ရို့ရခိုင်စာပီနန့် ဘာသာစကားနယ်ပယ်မာ ဧပိုင်ထူးခြားပြီးကေ ဗမာနန့်မတူရေ အရီးအသား အပြောအဆိုစကားသံတိ မကန်ဟိပါသိ့ရေ။ ရခိုင်လူမျိုးရို့အနီနန့် ယင်းချင့်တိကို ထုတ်ဖော်ရီးသား ပြောဆိုယင်းနန့် ရခိုင်စာပီနန့်ဘာသာစကားကို ထိန်းသိမ်းကာကွယ်စောင့်ယှောက် သင့်ပါရေ။ ယင်းပိုင်ထိန်းသိမ်းစောင့်ယှောက်မှရာ ရီမြင့်မှကြာတင့် ဆိုရေစကားပိုင် ရခိုင်စာပီအခြီမြင့်ပနာ ရခိုင်လူမျိုးလေ့သော့ ကမ္ဘာ့အလယ်မာ တင့်တယ်လာပါလိမေ။ ခိုင်မင်းဇံ(ရခိုင်ပြည်)

အာရုဏ်ဦးသို့

ရက္ခဝဏ္ဏ စာပီ၊ အက္ခရာ ငါရို့ လက်မာ မပျက်စီဘဲ နီ၊ လ တမျှ ထွန်းပလီအောင် အပြုသဘောဆောင် အတ္တဝင်္ကဘာတောင်က မင်းနန့် ငါ ပြဿနာ အသာချေနောက်ခိုင်း ရှည်လျားသမိုင်း ညှိုးနွမ်းမလားအောင် ရိုးတောင်တန်းထက်သို့ ပြိုင်တူလျှောက်လှမ်း ခရီးကြမ်းကေလေ့ နောက်ကိုလှမ်းကြည့်လိုက်..... ထော... ရှိမာအာရုဏ်ဦး အမှုံကူးစတစ်ရွီ စစီရရီတန်းစီလို့ ဖူးပွင့်လန်းစီဖို့ ရှီးစာပီဟောင်းတိ လမ်းကြောင်းပြရုံမက နီဝန်းကတစ်ခါ ပြောဆိုဆုံးမ လက်ညှိုးညွှန်းပြ ကျောက်တိုင်ထက်မာ ဧဂုထက်တိုင် ဟိနီလီယင့်.....။ ခိုင်ထွီး

ရက္ခိတလမ်း

သဇင်ပန်းခိုင် တမြိုင်မြိုင်လေ့ မကြိုင်မမွှီး ရနံ့တိမ်းဗျာလ် မုနိမြတ်စွာ သာသနာလေ့ ရောင်ဝါနီဝန်း ဂုဏ်ညှိုးနွမ်းဗျာလ် စဉ်လာလခြမ်း ရွှီရောင်လွှမ်းလေ့ ထီးနန်းပျက်သုဉ်း လူဖြစ်ယှုံးဗျာလ် မဟာလူသား ထမင်းစားလေ့ လူသားစင်စစ် စက်ရုပ်ဖြစ်ဗျာလ် အတိတ်ပုံလွှာ အသာခွါလို့ သေချာပြန်ကြည့် ကိုယ့်အလှည့်ကျ မတည့်မဖြောင့် ဘဇာကြောင့်လေ့ အဂေါင့်သူငါ တွေးတတ်ပါမှ မဟာရက္ခ ပြန်နိုးထမေ ဗမာလက်က လွတ်မြောက်မေ။ ခိုင်မင်းဇံ(ရခိုင်ပြည်)

အဝီးရောက်ရခိုင်

တစ်ရွာမပြောင်းကေ သူကောင်းမဖြစ်ဆိုရေအမြင် ဘဝင်မာစွဲမှတ် အမင်အဘာကိုဝေးသတ် ပြည်ရွာစွန့် အိမ်ယာစွန့်။ ဝံလက်နန့်လတအရောဝင် ဗန္ဒတ်ကိုအထင်ကြီး ရက္ခသွီးစစ်ကေလေ့ ကိုယ့်စာကိုမရီးသား ဘာသာခြားမာရှားလို့ကားလို့ အဖသားရို့ တော်ကတ်တေ။ မျိုးချစ်မဟာလတ် ကိုယ့်စွာကိုယ် ကင်းပွန်းပီး ရှက်မွီးမပါရေ ငါ မျိုးခြားတိနန့် အနီကြာ ရခိုင်စကားတောင်မပီဗျာလ်ကာ။ အဂေါင့်အဟုတ်ပါလို့ ကြွားလုံးထုတ်တေအဆင့် တစ်လုတ်ထမင်းမာ တို့စားနန့် ငပိရည် မပါကေလိုင်ခြောင်းထင့် ပစအကျင့်ဝမ်းအကျင့် ဝီးရွင့်လားရေချစ်ခြင်းတိ။ ကြည့်မှန်တစ်ချပ်ကိုထောင်ပနာ အခါတစ်ရာကျလားအောင် သီသီချာချာ ပြန်ပနာကြည့် မျိုးခြားဂီတနန့် စီးဆင်း ဗီဇပျက်ယွင်းနီရေ ငါ ရခိုင်သားနန့် တူသိ့လာဂု။ ။ ခိုင်မင်းဇံ(ရခိုင်ပြည်)

ရက္ခဝဏ္ဏအက္ခရာ(ခေါ်) ရခိုင်စာ

ဝသာလီခေတ် နှောင်းပိုင်းတွင် ရက္ခ၀ဏ္ဏအက္ခရာ ပေါ်ပေါက်လာပါသည်။ ယင်းနှောင်း ခေတ်ပိုင်းတွင် တွိရသော ရက္ခ၀ဏ္ဏအက္ခရာပါ ကျောက်စာများမာ ယေဓမ္မာဂါထာပါ ကျောက်စာ (ဧဂုမြောက်ဦးပြတိုက်)၊ ဝေသာလီမှ ကြိခ်ျမော်ရုပ်ပလ္လင်စာ(ဧဂုမြောက်ဦးပြတိုက်)၊ အာယနာကောင်း မှုတော် ကြီးဆီမီးခွက်စာ (ဧဂုရန်ကုန်)၊ ကျောက်တော် အုတ်ပုံတော်ဘုရားမှ အုပ်ခွက်ဘုရားစာ (ဧဂု ရန်ကုန် ရှီးဟောင်း သုတေသနဦးစီးဌာန)၊ ယေဓမ္မာပါ ကြီးပုရပိုက်ချေနှစ်ချပ် (ဦးကေသာရ မင်္ဂလာသုခကျောင်း၊ ရန်ကုန်) စသည်ဖြင့် ရက္ခ၀ဏ္ဏအက္ခရာ ရှိပြီးစာများဖြစ်ကြောင်းကို ဦးဦးသာထွန်း ဧ့ ရက္ခ၀ဏ္ဏအက္ခရာ ဆင်းသက်ရာ(လက်ရီးမူ)တွင် ဖော်ပြထားသည်။ ထို့နောက် ရက္ခ၀ဏ္ဏအက္ခရာ ဆင်းသက်လာပုံကို ဖော်ပြရာတွင် အက္ခရာဟူသည် (အတ္ထော အက္ခရာ သညာတော)ဟူသည့် ပါဋ္ဌ်အရ သင်္ကေတ အမှတ်အသားအားဖြင့် အနက်အဓိပ္ပါယ်ကို သိသာရန် အမှတ်သညာ တစ်ခုအနီနန့် အက္ခရာဝဏ္ဏစာလုံးရို့ကို ပြုပျင်ထားရသည်ဟု ဆိုလိုသည်။ လူမျိုးကိုသော် လည်းကောင်း၊ တိုင်းပြည် ကိုသော် လည်းကောင်း အစွဲပြု၍ စာပီများ ဖြစ်ပေါ်သည့်နည်းတူ ရက္ခိုင်တွင်လည်း ရက္ခသဒ္ဒါကို အစွဲပြု၍ ရက္ခ=ရခိုင်+၀ဏ္ဏ=အက္ခရာစာလုံး။ ရခိုင့်အက္ခရာစာလုံး ဖြစ်လာသည်ဟု ဆိုပါသည်။ ဆက်နွယ် ဆင်းသက်လာပုံကို စာရှည်မည်ဖြစ်၍ မဖော်ပြလိုတော့ပါ။ ဝေသာလီခေတ်သည် အေဒီ ၃၂၇-၉၅၇ ဖြစ်ပါသည်။ အေဒီ ၆-ရာစုတွင် သိန်ကန်မိန် ရွှန်းလိုက်ရတုကို သုဝဏ္ဏဒေ၀ီခေါ် စောပြည့်ညိုသည် ရခိုင်စာဖြင့် ရီးဖွဲ့ခပါသည်။ ယင်းရတုနန့် ပတ်သတ်၍ ဦးအောင်သာဦး မှတ်ချက်ပီးထားသည်မာ အထက်ပါ ရွှန်းလိုက်ရတုသည် ရာဇ၀င် အထောက်အထား အဖို့သာမဟုတ်။ ရခိုင်စာပီ အထောက်အထားအဖို့လည်း အလွန်အရေးပါသော ရတုဖြစ်သည်။ ဤရတုသည် သက်ဆိုင်နီသော အိမ်ရှိမင်းသား အဖို့ကိုထားဦး၊ မသက်ဆိုင်သူ အပြင် လူများဧ့ စိတ်ကိုပင် ညွတ်နူးအောင် ဆွဲဆောင်ထား၏။ သိမ်မွိ့သော အနက်အဓိပ္ပါယ်၊ ယဉ်ကျေးသော စကားလုံးအသုံးအနှုန်းတိကို မြင့်မြတ်သော စိတ်ထားနန့် ရီးထားကြောင်း တွိရ၏။ သို့ဖြစ်၍ ထိုခေတ် ထိုအချိန်မာ ရခိုင့်စာပီအဆင့်အတန်း မည်သည်လောက် မြင့်နီပြီးဖြစ်ကြောင်း သတိချပ်အပ်သည်။ ဧလောက် အဆင့်အတန်းမြင့်သော ကဗျာဖြစ်အောင် ရီးထားခသော ရခိုင်စာပီသည် ရှီး ဇာခေတ် ဇာအချိန်ကပင် ပေါ်ပေါက်နီလိမည်ကို သီဟိုခေတ် စတုတ္ထအကြိမ် ပီထက်အက္ခရာဖြင့် သင်္ဂါယနာ တင်နိုင်သော စာပီအဆင့်တန်းနန့် နှိုင်းယှဉ်၍ စဉ်းစားကတ်စီလိုသည်ဟု ဖော်ပြထားသည်။ (၈)ရာစု အစောပိုင်းတွင် ပေါ်ထွန်းသော သိန်ကန်မိန်ရတုသည် အစောဆုံး ရက္ခ၀ဏ္ဏအက္ခရာ စာပီဖြစ်သည်ဟု မြန်မာစာ ညွန့်ပေါင်းကျမ်း(ပထမတွဲ)မာ ဖော်ပြထားပါသည်။ ရန်ကုန်တက္ကသိုလ် စာကြည့်တိုက်တွင် ပီအမှတ် ၁၄၇၉၄-ရာဇသံနန့် စောပြည့်ညိုရတု (ပီမူ)(ရခိုင့်မူ)ဟု မှတ်တမ်းပြုထားသည်။ (မှတ်ချက်-စာဖတ်သူအမျာစုရို့ တွိနီရသော သိန်ကန်မိန်ရတုသည် မြန်မာမူ ဖြစ်နီသည်ကို သတိထားသင့်သည်။ ရခိုင်စာနန့် ရခိုင်မူ ဟိပါသည်။) မေဓပညာမော်ကွန်းလင်္ကာ(ပီမူ)ကို အေဒီ ၆၇၈-၆၉၄၃ အတွင်းတွင် ရက္ခ၀ဏ္ဏအက္ခရာဖြင့် ရီးစပ်ခပါသည်။ ဗျည်း ၃၃ လုံးလှီတော်သံ(ဓမ္မဇေယျအမတ်ကြီး)၊ စန္ဒြားမင်းဘွဲ့ရို့ ကိုလည်း ဝေသာလီခေတ်တွင် ရခိုင်စာပီဖြင့် ရီးစပ်ခပါသည်။ လေးမြို့ခေတ် (အေဒီ ၉၅၇-၁၄၃၀)နန့် ပုဂံခေတ် (အေဒီ ၁၀၄၄-၁၂၈၇)ရို့သည် ခေတ်ပြိုင်ဖြစ်သည်။ ပုဂံခေတ်တွင် မြန်မာ့အက္ခရာနန့် အယင်ဆုံးတွိရသော မြ၀တီကျောက်စာ (ခေါ်)ရာဇကုမာရကျောက်စာ(၄၇၄-ခု)ထက် လေးမြို့ခေတ် မင်းရင်ဖြူဆင်းတုဓမ္မခဏ်စာ( ၂၀၉-ခု)က ၂၆၅-နှစ် ယင်ပါသည်။ ထိုကျောက်စာကို ထောက်၍ ဦးရွှေဇံက ရက္ခ၀ဏ္ဏအက္ခရာမာ ထိုအချိန်ကပင် ပီပီပြင်ပြင် ဟိနီပြီးဖြစ်သည်ဟု ဆိုပါသည်။ နန်းကျားရပ်တော်မူ ဘုရားပလ္လင်စာ (၄၅၁-ခု)က နှစ်ပေါင်း (၂၃)နှစ်ယင်ပါသည်။ ဘူးကွဲတောင်ဘုရားကျောက်စာ(၄၅၂-ခု)က (၂၂)နှစ်ယင်ပါသည်။ မြစေတီ ကျောက်စာ ရီးထိုးပြီးမှ ရီးထိုးသော ရခိုင့်စာပီရို့ကို မဖော်ပြလိုပါ။ လေးမြို့ခေတ် ကျောက်စာနန့် ပုဂံခေတ် ကျောက်စာရို့ကို နှိုင်းယှဉ်ကာ သုတေသီ မေစ္စတာတေလာက ရခိုင်စကားသည် မြန်မာစကားနန့် အသံထွက်များစွာ ခြားနားမှုဟိကြောင်း၊ ရခိုင် စကားက ပိုရှိကျပြီး စကားသံနန့် စာလုံးပေါင်းရို့ ပိုလို့ဆီလျော်မှုဟိကြောင်း ဆိုပါသည်။ ဦးအောင်သာဦးက ရှီးခေတ် မြန်မာ့ ကျောက်စာများ၌ ရခိုင့်စာလုံးပေါင်း များစွာပါဟိကြောင်း တွိရ၏။ ထို့ကြောင့် ရခိုင်စာပီသည် မြန်မာစာထက် ရှီးကျသောစာ ဖြစ်သည်ဟု တင်ပြထားသည်။ ဦးဦးသာထွန်းသည် ပီမူမှ မူရင်းအတိုင်း ၁၁၉၂-ခုနှစ်တွင် ရခိုင်စာ သတ်ပုံကျမ်းကို ရီးကူးခပါသည်။ ရှီးခေတ် ပညာသျှင်ရို့သည် ရခိုင်စာကို ထိန်းကွပ်ရန် သတ်ပုံစာကျမ်း ပြုစုခခြင်း ဖြစ်တန်ပါသည်။ မိဘုရားသျှင်ထွီး အလယ်စေတီကျောက်စာ ကြောင်းရီ(၂၄)တွင် အပ်နဖားရှိ ခံတွင်းဟိသော ပြိတ္တာဟု ပါဟိသည်။ အပ်နဖားပေါက်နန့် အရှိရှိ (ထပ်တူထပ်မျှ) ခံတွင်းဟိသော ပြိတ္တာဟု ဆိုလိုသည်။ ယင်းစာကြောင်းသည် ရခိုင်စာ ရီးထုံးရီးနည်း အစအနချေတစ်ခု ဖြစ်ပါသည်။ ဇယန္တဗောဓိက ရီးနည်း(၂၀)ကျော် ပြုစုထားပြီး ဖြစ်သည်ဟု ဆိုပါသည်။ ရခိုင်စာနန့် မြန်မာစာသည် ဗြဟ္မီအက္ခရာမှ ဆင်းသက်လာသည့် ရင်ချင်းဆက် အမွှာစာပီ (၀ါ) မျိုးတူသံကွဲစာပီတိ ဖြစ်ကတ်ပါသည်။ ရခိုင်စာကို ရခိုင်ရို့ ထိန်းသိမ်းရပါမည်။ လူမျိုးခြားရို့ ထိန်းသိမ်းပီးမည်မဟုတ်။ ရခိုင်စာ ဟိ၊ မဟိကို ရခိုင်သားရို့ လိလာရမည်။ ရခိုင်စာဧ့ သဘောသဘာဝကို ရခိုင်သားရို့ သိထိုက်သည်။ ပန်မလာဂတ်မန်မှစ၍ အခြားစာပီပညာသျှင်ရို့သည် ရခိုင်စာပီကို အထူးပြုလိလာခပါသည်။ အရှိတိုင်း၊ အနောက်တိုင်း ပညာဟိရို့ဧ့ လေးစားမှုကို အစဉ်ပိုင်စိုးသော ရခိုင်စာသည် ခါးနာရာမှ တဖန် မြန်းလာလတ်ပါသည်။ မြန်းထက်မြန်းလာအောင် အာရက္ခရို့ မပြုစုသင့်ပါလား။ ဒေါင်တာသန်းထွန်းက ရခိုင်ရို့သည် အေဒီ ၆-ရာစုမတိုင်ခင်ကပင် စာရီးစာဖတ်တတ်ပနာ ယဉ်ကျေးမှု ထွန်းကားပြီးဟု ဆိုပါသည်။ ဧဂုခေတ် ရခိုင်ရို့သည်လည်း ရခိုင်စာကို ရီးတတ်ဖတ်တတ်ပနာ ယဉ်ကျေးမှု ထွန်းကား တုန်းသီးလား။ ။ သန့်ဝဏ္ဏခိုင် ရက္ခဝံလက်-ရခိုင်အမျိုးသားမဂ္ဂဇိန်းအမှတ်(၂)၊ စာ (၄၀) က ကူးယူးဖော်ပြပါ။

ရခိုင်ဘာသာစကားဧ့ ရ၊ယ၊လ၊ဝ ဆက်နွယ်မှုနန့် စံရခိုင်စာပီလမ်း

ရခိုင်စာပီအက္ခရာတိထဲမာ ရကောက်(ရ) ရေ အရေးပါဆုံး အက္ခရာဖြစ်တေလို့ ပြောကေ မှားဖို့မထင်ပါ။အကျွန်ရို့ဧ့ လူမျိုးဖြစ်တေ ‘ရခိုင်’ နန့် ယုံကြည်ကိုးကွယ်ရာဖြစ်တေ ‘ဘုရား’ ကို ရီးသားပြောဆိုရာမာ ရကောက် မပါကေ မပြီးရေပိုင် အကျွန်ရို့ဧ့ ယဉ်ကျေးမှုအသက်သွီးကြောဖြစ်တေ ရခိုင်စာပီကို ပြန်လည်ဖော်ထုတ်တေနီရာမာ ရကောက်(ရ) ရေ အရေးပါဆုံးအက္ခရာဖြစ်တေ။ ရခိုင်ဘာသာစကားတိပျောက်ကွယ်မလားအောင် ရကောက်(ရ) က ကျားကန်လို့ ပီးထားရေ။ ရခိုင်အက္ခရာစဉ် ဇာယားထဲမာ ယနန့်ရ ရေ တတက်ကပ်ပနာ ဟိနီကေလေ့ စကားပြောကတ်တေခါထိုးအထက်ထက်ကပင် ယသံ နန့် ရသံ ကို အလုံးကွဲအောင်ပြောကတ်တေ။ ယင်းရို့နန့် ဆက်စပ်နီရေ အပင့်၊အရစ်တိကိုလေ့ ပီပီပြင်ပြင်ပြောကတ်စွာကို တွိရရေ။ဒေသိယစကားတိကို လေ့လာကြည့်ကေရကောက်နန့် တခြားအက္ခရာတချို့အသံချင်းဆက်နွယ်မှုဟိရေပိုင် ယနန့် တခြားအက္ခရာတချို့အသံချင်းဆက်နွယ်မှုဟိကေလေ့ ရနန့်ယ ကား အသံချင်းဆက်နွယ်မှုကင်းစွာကို တွိရရေ။ ယင်းအတွက်နန့်လေ့ကျွန်သက်တမ်း နှစ်ပေါင်းနှစ်ရာကျော်ကြာလားသည့်တိုင် ရခိုင်စကားတိကို ထိန်းသိမ်းနိုင်စွာ ဖြစ်တေ။ ရခိုင်စာပီသုတေသီ ဆရာကြီးမောင်ဗသိန်းဧ့ သုတေသနပြုချက်အရ ရကောက်အသုံး(၇၈)မျိုးဟိစွာကို သိရရေ။ လူထုဆက်သွယ်ရေးစနစ်တိ ဒုံးသီးလောက်လျင်လာရေ ဧနိ့ခေ တ်မာ ဗမာစကားကို အယင်ထက်အပြောများလာကတ်ရရေအတွက်ကြောင်းတစ်ကြောင်း၊ ဗမာတေးခြင်း၊ဗမာဗွီဒီယို အစဟိရေဘာသာစကားနန့်သက်ဆိုင်ရေ ရုပ်သံပိုင်းဆိုင်ရာ လွှမ်းမိုးမှုများလာစွာကတစ်ကြောင်း ရသံတချို့ရေ ယသံအဖြစ်ဖောက်ပြန်အခြီယိုင်လာပါရေ။ ယင်းအခြီယိုင်လာရေ ရသံတိကို စာပီနန့်အနုပညာသမားရို့ကရသံနန့် ယသံ မတူအောင် အရေးတစိုက်တည့်မတ်ကျားကန်ပီးမှု အားနည်းရေအတွက် မျိုးဆက်သစ်ရခိုင်တိက ရခိုင်ရသံတချို့ဧ့ဖောက်ပြန်လာရေ ယသံကို ပင်မရခိုင်စကားသံအဖြစ် အထင်မှားလားခြင်းကို စိတ်ဆင်းရဲကြီးစွာမြင်တွိရပါရေ။ရခိုင်စာပီကို ချစ်မြတ်နိုးသူတိကရာ မထိန်းသိမ်းပါကေ ရှိ(အရှိဖက်)၊ရှီး(ရှီးခေတ်)၊ရင်(ငါးအိုးရင်)၊ ရှား(ထင်ရှား)၊ရှု(ကြည့်ရှု)၊ရှူး(မီးရှူး)၊ရွှီ(ရွှီတူပန်း)၊ရွှင်(ပျော်ရွှင်) အစဟိရေ ရခိုင်ရသံတိစွာ သင်ခါရ တရားအောက်မာ မကြာခင်ပျောက်လားနိုင်ရေ။ ရကောက်နန့် ဆက်နွယ်နီရေ ရရစ်သံတချို့လေ့သော့ ယပင့်သံဖက်ကို အခြီယိုင်လာပနာ တချို့ရသံတိကျခါ အသုံးးနည်းလာရေအတွက် ယှားပါးရခိုင်စကားတိဖြစ်လာပါလတ်တေ။တချို့ရခိုင်ရသံတိဆိုကေ ယသံဖက်ကို အခြီမယိုင်ဘဲနန့် လသံ(လဧ့အသံ)ဖက်ကို အခြီယိုင်လာစွာတွိရရေ။ဧအကြောင်းရင်းကို စီးစစ်ကြည့်ရေအခါမာလေ့ ဗမာစာပီနန့်ဘာသာစကားဧ့ ပရောဂတိရာဖြစ်နီပြန်ရေ။ စာပီအင်္ဂါရပ်တိနန့် ကိုက်ညီအောင် ဗမာစာပီမာ ရကောက်ကို ထည့်သွင်းပနာ ပြဌာန်းထားကေလေ့ နိ့စဉ်သုံးစွဲပြောဆိုကတ်တေ ဗမာစကားတိမာကား ရသံ(ရကောက်ဧ့အသံ)ကို အတွိရယှားရေ။ မသုံးမဖြစ်သုံးရရေ ပါဠိစကားတချို့လောက်ကိုရာ ရသံနန့်ဖတ်ပနာ ကျန်ရေ ရကောက်နန့်ပတ်သက်တေ အရီးအသားတိကို လသံ(လဧ့အသံ)နန့် ပြောကတ်စွာကို တွိရရေ။ပါဠိစကားက မွီးစပ်ယူထားရေ တိရိ စ္ဆာန် ကို တလိတ်ဆန် လို့ပြောကတ်ပနာ၊ ရေဒီယို၊ ကာရာအိုကေ အစဟိရေ အင်္ဂလိပ်ပါးကမွီးစပ်စကားတိကိုလေ့ လေဒီယို၊ ကာလာအိုကေ လို့ ပြောကတ်စွာတိ တွိရရေ။ ယင်းအတွက်နန့်လေ့ ဗမာတိကျွန်ပြုခံ အကျွန်ရို့ရခိုင်လူမျိုးတိမာ ဗမာတိပါးကမွီးစပ်ယူထားရေစကားဖြစ်တေ ‘လွတ်လပ်ရေး’ ကအစပြုပနာ ရခိုင်ရသံတိစွာ ဗမာတိက လသံဆိုကေ လသံ၊ဗမာတိက ယသံဆိုကေ ယသံ ဆိုပြီးကေ ဗမာဘာသာစကားနောက် တကောက်ကောက်လိုက်ပါနီစွာတွိရရေ။ ယင်းရကောက်အသုံးတိထဲက အပြောဖက်မာ မဆိုစလောက်ချေရာကျန်ပနာ အရီးဖက်ကို လုံးဝလိုက်မပါရေ ရသံတစ်ခုက ‘ရို့’ ဖြစ်တေ။ ‘ရို့’ ကို မင်းရို့၊ငါရို့၊အကျွန်ရို့ စသည်ဖြင့် သုံးကတ်တေပိုင် မဟုတ်လို့၊ဇာဖြစ်ရို့၊လားဖို့ရို့ ဆိုပနာ ပြောခကတ်စွာတိတွိရရေ။ ပလက်ဝနယ်နန့် စစ်တကောင်း တောင်တန်း ဒေသဖက်တိမာ ဒေ ရအသုံးကို အဂုထက်ထိတွိနီရသိ့ရေ။ ယေကေလေ့ ‘လို့’ ကို အသုံးများလာစွာကတစ်ကြောင်း၊ရို့နန့် လို့ ကွဲပြားစီချင်ရေ ဆင်ခြီဆင်လက်တိကတစ်ကြောင်း ယင်း ရသံစွာသင်္ခါရတရားကို မျက်မှောက်ပြုလားရစွာဖြစ်တေ။ တခြားရအသုံးတိဖြစ်တေ ရွှ(ရွှတိုက်) ၊ရွင့်(ရွင့်ပြာသတ်) ၊ရွှင့်(စပါးရွှင့်) ၊ရွတ်(ခွင့်ရွတ်)၊ ရွန်(ရွန်ဆွဲပွဲ)၊ ရွန်း(ကြိုးရွန်း)၊ ရွှဲ(ယိုင်းရွှဲ) အစဟိရေဝေါဟာရတိစွာ ရခိုင်တချို့ဧ့ပစ(ပါးစပ်)နန့် လက်ကမြင်းကတ်မှုကြောင့် လွှတိုက်၊ လွင့်ပြာသတ်၊ စပါးလွှင့်၊ခွင့်လွှတ်၊ လွန်ဆွဲပွဲ၊ ကြိုးလွန်း၊ ယိုင်းလွှဲ ဆိုပနာ ပြောင်းလဲလာပါရေ။ ယင်းပိုင် ရခိုင်ဘာသာစကားတိပြောင်းလဲလာစွာရေ ဖောက်ပြန်ရာကစစွာ ဖြစ်တေအတွက်နန့် စလို့ဖောက်ပြန်လောက်ကပင် ဆန့်ကျင်ပနာ ရခိုင်စာပီနန့် ဘာသာစကားကိုထိန်းသိမ်းကယ်တင်ကတ်ပါ။ ရသံတိရေ ထိန်းသိမ်းပြောဆိုခြင်းရေ ရခိုင်စာပီကို လက်တွိကျကျချစ်ခြင်းဖြစ်တေ။ ရသံကိုပြောဆိုရခက်တေအသံဖြစ် အကျွန်ယူဆမိပါရေ။ ဇာဖြစ်လို့လေးဆိုကေ ရခိုင်စာပီဖြစ်စဉ်တိထဲမာအသိအမှတ်ပြုမှုမဟိကေလေ့ ရှီးအထက်ထက်ကပင် ရသံတချို့ကို ဝသံ(ဝဧ့အသံ)နန့် ပြောကတ်စွာကိုတွိရရေ။ ရွာသား ကို ဝါသား၊ ရောစပ် ကို ဝေါစပ်၊ ရင်ခွင် ကို ဝင်ခွင်၊ ဆံတော်ရှင် ကို ဆံဒဝင်၊ ငါးသူရဲ ကို ငသဝဲ၊ ရီတွက် ကို ဝီတွက်၊ စာရီး ကို စာဝီး၊ရွှီတစ်ရွဲ ကို ရွှီတစ်ဝဲ၊ ရွံယှာ ကို ဝံယှာ၊ထရံတစ်ရွှား ကို ထရံတစ်ဝှါး၊ တိုးရွိ ကို တိုးဝိ ဆိုပြီးကေ ပြောဆိုမှုတိဟိရေပိုင် ပြော ကို ပေါ လို့ ပြောဆိုမှုတိရေ ဝတီလေးရပ်နီရာအနှံ့ မာဟိနီပါရေ။ ဆံတော်ရှင်၊ ငါးသူရဲနန့် စာရီး ဆိုရေ ဝေါဟာရတိရေ ဝသံအဖြစ်မပြောင်းလဲခင်မာ ဆံဒရွှင်၊ ငသရွဲ၊ စာရွီး ဆိုပြီးကေ ကြားမာ ရွ(ရကောက်ဝဆွဲ) သံ တဆင့်ပြောင်းလဲခကြောင်းတွိရရေ။ ဧစကားတိရေ မိရိုးဖလာ ရခိုင်စကားတိဖြစ်တေအတွက် အသိအမှတ်ပြုဖို့ လိုအပ်တေပိုင် အရီးဖက်မာကျခါ မူလအရီးအသားဖြစ်တေ ရသံနန့်ရာ ရီးသားသင့်ရေ။ယေမှလေ့ အကျွန်ရို့လားနီကတ်တေ ရခိုင်စာပီပန်းတိုင်ကို အလျင်ရောက်ပါလိမေ။ ရခိုင်ရသံတချို့ကို ဝသံနန့် ပြောဆိုကတ်တေပိုင် ရသံနန့် ပြောဆိုကတ်တေ ဝအရီးအသားတချို့လေ့ ဟိနီရေ။ ဝါးလုံး ကို ရလုံး၊ ဝါးပိုင်း ကို ရပိုင်း၊ ဝါးခြမ်း ကို (ရခြမ်း၊ ရှောက်ခွမ်း)၊ ဝဖြီး ကို ရဖြီး ကို ပြောဆိုကတ်စွာတိ တွိရရေ။ ဧဝေါဟာရတိမာ ဝဖြီး ကို ရဖြီး လို့ ပြောရေအတိုင်း ရီးကတ်စွာကလွဲလို့ တခြားဝေါဟာရတိစွာ အပြောသက်သက်နန့် အနီကျနီစွာတွိရရေ။ အမှန်က ရဖြီးဆိုစွာ ဂေါင်းဖြီးကတဆင့်စကားသံပြောင်းလဲလာစွာဖြစ်တေ။ဂေါင်းဖြီးကနီပမာ ဝဖြီး၊ ဝဖြီး က နီပနာ ရဖြီး ဖြစ်လာစွာရာ။ ရခိုင်စကားသံတိထဲမာ ဥ၊ဦးဂေါင်း၊နန့် ဂေါင်း နီရာတိမာ ဝ ကို ထည့်ပြောကတ်တေအတွက်ဂေါင်းဖြီးကနီ ဝဖြီး ဖြစ်လာစွာဖြစ်တေ။ ရခိုင်စကားတိထဲမာ ဥတင်း ကို ဝတင်း၊ ဦးပုသ် ကို ဝပုတ်၊ ဦးထုပ်(ဂေါင်းချုပ်) ကိုဝထုပ်၊ ဦးရာဇ် ကို ဝရာဇ် လို့ အစဉ်မလာ ပြောကတ်စွာတိကို ကြည့်ကေ သိနိုင်ပါရေ။ ရခိုင်စကားသံတိရေ ရသံ ကနီပနာ ယသံနန့် လသံ ဖက်ကို ဖောက်ပြန်ခြင်းနန့် ရသံ နန့် ဝသံရို့အပြန်အလှန် ဆက်နွယ်ပြောဆိုခြင်းတိ ဟိရေပိုင် လသံ(လဧ့အသံ)ကို ယသံ(ယှသံ၊ချသံ၊သျှသံ) နန့်ပြောဆိုကတ်စွာတိလေ့တွိရရေ။ အကျွန်ရို့ရခိုင်လူမျိုးတိရေ အလျား ကို အယား၊ အလျင် ကို အယင်၊လျော့ ကို ယော့၊ လျက်ဆား ကို ယက်ဆား၊ အလျင်း ကို အယှင်း(အချင်း)၊ လျှံ ကို ယှံ(ချံ) ၊ လျောက် ကို ယှောက်(ချောက်)၊ လျှပ် ကို ယှပ်(ချက်) ဆိုပနာ အစဉ်အလာပြောကတ်စွာတိ ဟိပါရေ။ ခေတ်ရီစီးကြောင်းတိ ပြောင်းလဲလာရေပိုင် ဘာသာစကားတိလေ့ ပြောင်းလဲတတ်စွာကားအမှန်ပင် ဖြစ်တေ။ ကောင်းမွန်သော ပြောင်းလဲမှုတိ(သို့မဟုတ်) ပရောဂမပါရေ ပြောင်းလဲမှုတိကို ကြိုဆိုသင့်ရေပိုင် တခြားဘာသာစကားတစ်ခုဧ့ပရောဂကြောင့်ဖောက်ပြန်လာရေဘာသာစကားတိကိုရခိုင်စာပီလောကသား အားလုံး ဝိုင်းဝန်းဆန့်ကျင်ကတ်ဖို့လိုပါရေ။ ယေမှလေ့ ရခိုင်စာပီကို ချစ်မြတ်နိုးရာရောက်ပနာ အကျွန်ရို့ ချစ်တေ ရခိုင်စာပီလေ့သော့ အဆင့်အတန်းမွီလာပါလိမေ။ ခိုင်မင်းဇံ(ရခိုင်ပြည်)